زنا کے دنیوی اور اخروی نقصانات

از قلم۔ محمد احمد حسن سعدی امجدی ، زنا کے دنیوی اور اخروی نقصانات

زنا کے دنیوی اور اخروی نقصانات

اس وقت پوری دنیا نفس پرستی اور شہوت پرستی کے سیلاب سے متاثر ہو رہی ہے ، ہر طرف بے حیائی اور عریانیت معاشرتی نظام کو نقصان پہنچا رہے ہیں ، اخلاقی اقدار دن بدن پامال ہورہے ہیں ، گناہوں کی کثرت ہو رہی ہے اور زنا کاریاں عام ہوتی جارہی ہیں ، جو کہ دنیا کی بدترین گناہوں میں سے ایک برا گناہ ہے اور دنیا کے تمام آسمانی مذاہب میں زنا کو مذموم اور لائق ملامت سمجھا گیا ہے

دور حاضر میں نوجوان بچے جس تیزی کے ساتھ شیطان کے بہکاوے میں آ کر زنا کی طرف آمادہ ہو رہے ہیں، یہ پورے معاشرے کے لیے ایک بڑے فساد کا سبب ہے، کیونکہ یہ ایک ایسا گناہ ہے کہ آخرت میں تو اس کی سزا ہر حال میں ملے گی ، ساتھ ساتھ دنیا میں بھی زنا کے نقصانات ظاہر ہونے لگتے ہیں

اب آئیے دیکھیں کہ قرآن پاک اور حدیث مصطفی صلی اللہ علیہ وسلم میں زنا کی وجہ سے دنیا اور آخرت میں ہونے والے نقصانات اور اس سے بچنے کے طریقے کو تفصیل سے بیان کیا گیا ہے، زنا ایک کھلی ہوئی بے حیائی ہے ۔ قرآن پاک میں اللہ تبارک وتعالی نے زنا کو ایک کھلی بے حیائی اور گھناؤنا عمل قرار دیا ہے

زنا يقيني طور سے بڑی بے حیائی اور بے راہ روی ہے۔ (سورۃ الإسراء 32)

ایک دوسرے مقام پر اللہ تبارک و تعالیٰ ارشاد فرماتا ہے. زنا بڑی بے حیائی نا پسندیدہ عمل اور بے راہ روی کی بات ہے۔(سورة نساء 22) زنا کے قریب جانا بھی ممنوع ہے۔

جب کوئی چیز بہت زیادہ خطرناک اور خوف ناک ہوتی ہے تو اس سے نقصان بھی اتنا ہی زیادہ ہونے کا امکان ہوتا ہے اور اس سے دور رہنے کی تنبیہ بھی اسی حساب سے کی جاتی ہے، یہی وجہ ہے کہ بھڑکتی آگ کے قریب سے بھی نہیں گزرا جاتا کیوں کہ نہ معلوم کب کون سی چنگاری آگ کے شعلوں سے بلند ہوں اور اس سے انسان کو نقصان پہنچ جائے، اسی طرح زنا بھی ایسی ہی مہلک اور خطرناک چیز ہے کہ اللہ نے اس کے قریب جانے اور اس کے اسباب سے بھی دور رہنے کی تلقین فرمائی ہے

اللہ تبارک و تعالی ارشاد فرماتا ہے ۔ اور زنا کے قریب بھی نہ پھٹکو ۔ (سورۃ اسراء 32)

اس کے علاوہ ایک دوسرے مقام پر اللہ ارشاد فرماتا ہے ۔ بے حیائی کے کاموں کے قریب بھی نہ پھٹکو چاہے وہ بے حیائی کھلی ہو یا چھپی۔(سورۃ انعام 15)

الحمدللہ ، اسلام دنیا کا واحد ایسا مذہب ہے کہ اس نے زنا کی حرمت کے کے ساتھ ساتھ جو چیزیں زنا کی طرف ابھارنے والی ہیں، اسلام نے ان کے قریب جانے سے بھی منع فرمادیا، چنانچہ مذکورہ آیت کی رو سے نامحرم کو دیکھنا، باتیں کرنا یا سننا یا اس کی جانب چل کر جانا ، ملاقات کرنا، چھونا یا بوس و کنار کرنا یہ سب حرام اور ناجائز ہیں کیوں کہ یہ سب زنا کے اسباب ہیں

لہذا ان سے بچنا نہایت ہی ضروری ہے ، احادیثِ مبارکہ میں ان سب کو بھی زنا ہی قرار دیا گیا ہے۔ شرک کے بعد سب سے بڑا گناہ زنا ہے۔ حضرت ہیثم بن مالک طائی نبی کریم صلی اللہ علیہ وسلم کا ارشاد نقل کرتے ہیں کہ اللہ تعالی کی ذات کے ساتھ کسی کو شریک نہ ٹھہرانے کے بعد کوئی گناہ زنا سے بڑا نہیں کہ کوئی شخص اپنے نطفے کو اس رحم میں رکھے جو اس کے لیے حلال نہیں۔ (تفسیر ابن کثیر 5-72)

دنیا اور آخرت میں زنا کے 6 بڑے نقصانات

حضرت حذیفہ بن یمان سے مروی ہے کہ نبی کریم صلی اللہ علیہ وسلم نے ارشاد فرمایا ! اے مسلمانو زنا سے بچو اس لیے کہ اس میں چھ نقصانات ہیں، 3 دنیا میں اور 3
آخرت میں۔

دنیا کے تین نقصانات یہ ہیں۔ 1-زنا کرنے والے کے چہرے کی رونق ختم ہو جانا ۔ 2-مسلسل غربت۔ 3-عمر کا کم ہو جانا-

آخرت میں پیش آنے والی تین چیزیں یہ ہیں۔ 1-اللہ کی ناراضگی۔ 2-برا حساب و کتاب۔3-دوزخ کی آگ میں ہمیشہ رہنا ۔ (شعب الایمان 5091)

زنا سے چہرے بے رونق اور بے نور ہو جاتے ہیں۔ مذکورہ بالا حدیث کی روشنی میں پتہ چلا کہ زنا کرنے والوں کو دنیا میں سخت ذلت و رسوائی سے دوچار ہونا پڑتا ہے، جن میں پہلی سزا یہ کہ زنا کرنے والے کے چہروں کی رونق ختم ہو جاتی ہے اور ان کے چہروں سے ہمیشہ ذلت و خواری کا علامت ظاہر ہوتی ہے۔

ایک دوسرے مقام پر نبی کریم صلی اللہ علیہ وسلم نے ارشاد فرمایا! تم لوگ ضرور اپنی نگاہوں کی حفاظت کرو اور اپنے چہرے کو سیدھا رکھو، ورنہ تمہارے چہروں کو بے نور کر دیا جائے گا ۔ زنا سے فقر و فاقہ اور مسکنت پیدا ہوتی ہے ۔ حضرت عبداللہ بن عمر رضی اللہ عنہ سے مروی ہے کہ آقا ﷺ نے ارشاد فرمایا ! جب حکمران ظلم کریں تو آسمان سوکھ جاتا ہے، جب زکوۃ روک لی جائے تو مویشی ہلاک ہوجاتے ہیں، جب زناکاری پھیل جائے تو فقر وفاقی اور مسکنت عام ہو جاتی ہے، اور جب ذمہ توڑے جانے لگیں تو کافروں کو غلبہ دیا جاتا ہے۔ (مسند البزار 5383)

حضرت عبداللہ بن عمر رضی اللہ عنہ حضور ﷺ کا یہ ارشاد نقل کرتے ہیں کہ زنا فقر کے پیدا ہونے کا سبب ہے۔ (شعب الایمان 5034) اس حدیث کی روشنی میں یہ بات سامنے آئی کہ جو لوگ دنیا میں زنا کرتے ہیں تو اللہ تبارک وتعالی ان کی روزی کو روک لیتا ہے اور فقر و فاقہ میں مبتلا فرما دیتا ہے

لہذا ہمارے جو مسلمان بھائی بھی اس گناہ میں مبتلا ہیں ،انھیں چاہیے کہ وہ اپنے اس گناہ سے توبہ کریں ۔زنا سے وبائی امراض پھیل جاتے ہیں۔ حضرت کعب رضی اللہ عنہ سے موقوفا مروی ہے !جب تم دیکھو کہ بارش کا قحط پڑ گیا ہے تو سمجھ لو لوگوں کی جانب سے زکات روک لی گئی اور جب تم دیکھو کہ تلواریں برہنہ ہو گئیں تو سمجھ لو کہ اللہ کا حکم ضائع کر دیا گیا جس کی وجہ سے لوگ ایک دوسرے سے خود ہی انتقام لینے لگے ہیں، اور جب تم دیکھو کہ وبائی امراض ظاہر ہونے لگے ہیں تو جان لو کہ زنا کاری عام ہو گئی ہے۔ (شعب الایمان 3041)۔

معزز قارئین! بلا شبہہ اللہ کے نبی ﷺ نے صراحت کے ساتھ ارشاد فرما دیا ہے کہ وبائی مرض زنا کی زیادتی سے ہے، لہذا اس میں کوئی شک نہیں فی الوقت پوری دنیا جس کورونا سے دوچار ہو رہی ہے اس کی سب سے بڑی وجہ پوری دنیا میں زنا کا عام ہونا ہے، دور حاضر میں ہر شہر اور ہر قصبے میں زنا کی کثرت پائی جا رہی ہے، حتى کہ کل تک جو تعلیم کے مرکز تھے ، اختلاط مرد و زن کی وجہ سے وہاں بھی زناکاری عام ہوتی جا رہی ہے لہذا اگر وبائی امراض سے بچنا ہو تو زنا پر کنٹرول کرنا ہوگا۔

اور ایک دوسری حدیث پاک میں ہے کہ جس قوم میں فحاشی اس قدر ظاہر ہوجائے کہ لوگ کھلم کھلا بے حیائی کے کام کرنے لگیں تو اس میں طاعون پھیل جاتا ہے۔ زنا کی وجہ سے دعائیں قبول نہیں ہوتی۔

ایک روایت میں ہے حضرت عثمان بن ابی عاص ثقفی حضور ﷺ سے روایت کرتے ہیں کہ آسمان کے دروازے نصف شب میں کھول دیے جاتے ہیں اور ایک پکارنے والا ندا لگاتا ہے ، کوئی مانگنے والا ہے کہ اس کی دعا قبول کی جائے! کوئی سوال کرنے والا ہے کہ اس کو عطا کیا جائے ! کوئی مصیبت میں مبتلا ہے کہ اس کی تکلیف دور کی جائے !پس جو مسلمان اس وقت دعا کرتا ہے اس کی دعا قبول ہو جاتی ہے سوائے زنا کی کوشش کرنے والے کے اور جبرا ٹیکس وصول کرنے والے کے۔

حدیث پاک کی روشنی میں زنا کے دنیوی نقصانات میں سے چند کو بیان کر دیا گیا اس کے علاوہ بھی بے شمار احادیث ہیں ، جن کو اگر صحیح طریقے سے پڑھ لیا جائے یا سن لیا جائے تو انسان زنا کے بارے میں سوچنے سے بھی پرہیز کرے گا۔ زنا کے اخروی نقصانات۔ بلاشبہ زنا کے اخروی نقصانات دنیوی نقصانات سے بہت زیادہ ہیں کیونکہ دنیا کی زندگی تو محدود ہے کہ انسان کو 70 یا 80 سال ہی دنیا میں رہنا ہے ، حالاں کہ آخرت کا عذاب تو نہایت ہی طویل ہوگا،حدیثوں میں آتا ہے کہ اس کا ایک دن پچاس ہزار سال کے برابر ہوگا ، تو ذرا اندازہ لگائیں کہ آخرت کے عذاب کو برداشت کرنا کس قدر مشکل ہوگا