حیات غوث اعظم کے چند تابندہ نقوش

ایک مشکل مسئلہ کا حل:

حضور غوث اعظم رضی اللہ تعالٰی عنہ مشکل سے مشکل مسئلے کا حل فوراً عنایت فرمادیتے. بلادعجم سے ایک سوال آیا جس کا جواب عراق عرب اور عراق عجم کے علمانہ دے سکے. سوال یہ تھا کہ ایک شخص نے اپنی بیوی کوتین طلاق اس شرط پر معلق کی کہ وہ ایسی عبادت کرے گا جس میں وہ عبادت کے وقت تنہاں ہو، اگر ایسی عبادت نہ کرے تواس نے کہا :میری بیوی مجھ پر تین طلاق سےحرام ہوگئ۔

جب یہ سوال حضور غوث اعظم کی بارگاہ میں آیا تو آپ نے فوراً اس کا جواب تحریر فرمایاکہ: وہ شخص مکہ معظمہ جائے، اس کے لیے خانہ کعبہ کو خالی کرادیاجائے اور وہ تنہا سات چکر طواف کرے، اس وقت اس عبادت میں کوئی دوسرا اس کے ساتھ شر نہ ہوگا، سوال کرنےوالا جواب ملتےہی ایک رات بھی بغداد میں نہ رہا اور اسی دن مکہ معظمہ کےلیے روانہ ہوگیا. (قلائدالجواہر. ص:38)

وعظ و خطابت:

حضور غوث اعظم، ہفتے میں تین دن خطابت فرماتے، جمعہ کی صبح، منگل کی شام اور اتوار کی صبح.حضرت غوث اعظم فرماتے ہیں کہ: ابتداء مجھ پر وعظ و تقریر کا اس قدر غلبہ ہوتا کہ خاموش رہنا میری طاقت سے باہرہوجاتا، میری مجلس میں دو یا تین آدمی سننے والے ہوتے، مگر میں نے سلسلہء کلام جاری رکھا پھر لوگوں کا ہجوم اس قدر بڑھا کہ جگہ تنگ ہوگئ، پھر عیدگاہ میں خطاب شروع کیا، وہ بھی ناکافی ہوئی، تو شہر سے باہر کھلےمیدان میں اجتماع ہونے لگا، اور ایک ایک مجلس میں ستر ہزار کے قریب سامعین جمع ہونے لگے.(اخبارالاخیار. شیخ عبدالحق محدث دہلوی ص:37.38.)

جب آپ کرسی خطابت پر تشریف فرماہوتے تو مختلف علوم وفنون میں گفتگو فرماتے، اور ہیبت اتنی ہوتی کہ مجمع پر سنٹا چھاجاتا، پھر اچانک فرماتے:قال ختم ہوا اور اب ہم حال کی طرف متوجہ ہوتے ہیں، یہ سنتے ہی سامعین کی حالت میں عظیم انقلاب رونما ہوتا، کوئی آہ و بکا میں مصروف ہوتا، کوئی مرغ بسمل کی طرح تڑپ رہاہوتا، کسی پر وجدکی کیفیت طاری ہوتی اور کوئی کپڑے پھاڑ کرجنگل کی راہ لیتا، کچھ ایسے بھی ہوتے جن پر شوق اور ہیبت کا اس قدرغلبہ ہوتاکہ طائر روح قفس عنصری سےہی پرواز کرجاتا. غرض یہ کہ حاضرین و سامعین میں سے کوئی بھی متاثر ہوئے بغیر نہ رہتا. (اخبارالاخیار. ص:39)

حضور غوث اعظم رضی اللہ تعالٰی عنہ نے ایک دن دوران واعظ فرمایا کہ :مجھے رسول اللہ صلی اللہ تعالیٰ علیہ وسلم کی زیارت ہوئی، انھوں نے فرمایا: بیٹے! تم خطاب کیوں نہیں کرتے؟ عرض کیا:میں عجمی ہوں، بغداد کے فصحا کے سامنے لب کشائی کیسے کروں؟

حضور نے مجھے سات مرتبہ لعاب دہن عطا فرمایا اور ارشاد فرمایا :لوگوں سے خطاب کرو اور انھیں حکمت مواعظہ حسنہ سے اپنے رب کی طرف بلاؤ، اتنے میں نماز ظہر پڑھی اور بیٹھ گئے، لوگوں کا ایک ہجوم جمع ہے، مجھ پر کپکپی طاری ہوگئ، کیا دیکھتا ہوں کہ حضرت علی مرتضیٰ رضی اللہ تعالٰی عنہ تشریف فرما ہیں انھوں نے چھ مرتبہ لعاب دہن عطا فرمایا، میں نے عرض کی سات کی تعداد پوری کیوں نہیں فرمائی؟ فرمایا :رسول اللہ صلی اللہ تعالیٰ علیہ وسلم کے ادب کے پیش نظر (زبدۃ الاسرار. ص:56. اخبار الاخیار. ص:38)

حضور غوث اعظم فرماتے ہیں: کہ میرے ہاتھوں پر پانچ ہزار سے زیادہ یہود و نصاریٰ تائب ہوکر مشرف باسلام ہوئے، رہزنوں اور فسق و فجور میں مبتلا افراد جنھوں نے میرے ہاتھوں پر توبہ کی ان کی تعداد ایک لاکھ سے زیادہ ہے. (قلائدالجواہر. ص:19)

شیطان کا مکروفریب: اللہ تبارک و تعالیٰ قرآن مجید میں ارشادفرماتاہے :ان الشیطن للإنسان عدومبین(سورہ یوسف.آیت5) بےشک شیطان آدمی کا کھلا دشمن ہے. (کنز الایمان) یہ بات بہت واضح ہے کہ شیطان انسان کا کھلادشمن ہے ، اس کا کام ہی بہکانا، راہ راست سے لوگوں کو بھٹکاناہے، چناں چہ شیطان نے حضور غوث اعظم کو بھی بہکانےکی کوشش کی مگر اسے کامیابی نہ ملی

ایک مرتبہ حضور غوث اعظم عبادت میں مصروف تھے کہ زمین سے آسمان تک تیز روشنی پھیل گئی، اور اس روشنی سےایک صورت ظاہر ہوئی، جس نے بڑی گرجدار آواز میں آپ سے کہا:اے عبدالقادر! میں تیرا رب ہوں، تیری عبادت وریاضت سے خوش ہوکر میں نے فرائض کو تجھ پر معاف کر دیا، اور حرام چیزوں کو حلال کردیا

لہٰذا اب جو چاہو سوکرو. آپ نے لاحول پڑھا اور وہ روشنی غائب ہو گئی اور اندھیراپھیل گیا، اور وہ شکل جو ظاہر ہوئی تھی دھواں بن گئ، پھر اس سے آواز آئی، اےعبدالقادر! تیرے علم نے تجھے بچالیا. جاتے جاتے شیطان کا آپ پر آخری وار تھا. آپ نے فرمایا:اے مردود! علم نے نہیں،بلکہ مجھے مولیٰ تعالیٰ کی رحمت نے بچالیا ہے۔

آپ کی یہ بات سن کر ابلیس لعین اپنا سر پیٹنےلگا اور کہا:اب تو میں آپ سے قطعاً مایوس ہوچکاہوں اور آئندہ آپ پر وقت ضائع نہیں کروں گا، آپ نے فرمایا :دور ہوجا مردود میں تیری کسی بات کا اعتبار نہیں کروں گا اور ہمیشہ تیرے مکرسے اللہ کی پناہ مانگتا ہوں.(طبقات الکبریٰ، ج:1.ص:27.قلائدالجواہر.ص:11تا21. ملخصا)۔

ابن تیمیہ یہ واقعہ لکھنے کے بعد کہتاہے: کہ حضرت شیخ سے پوچھاگیاکہ آپ نے کیسے جانا؟ کہ یہ شیطان ہے؟ فرمایا:اس لیے کہ اس نے کہا کہ میں نے تمھارے لیےوہ سب کچھ حلال کردیا جو دوسروں پرحرام ہے، حالاں کہ مجھے یقین تھا کہ محمد مصطفیٰ صلی اللہ تعالیٰ علیہ وسلم کی شریعت نہ تو منسوخ ہوسکتی ہے اور نہ ہی اس میں تبدیلی کی جاسکتی ہے، دوسری وجہ یہ تھی کہ اس نےکہا کہ میں تمھارا رب ہوں، وہ یہ نہیں کہہ سکا کہ میں اللہ ہوں جس کے سوا کوئی عبادت کے لائق نہیں ہے. (فتاویٰ ابن تیمیہ. احمد بن تیمیہ. ص:173.طبع :سعودیہ)

اخلاق و عادات:آپ کے اخلاق و عادات انك لعلی خلق عظيم کا نمونہ اور انك لعلی ھدی مستقیم کا مصداق تھے، آپ تنے عالی مرتبت، جلیل القدر وسیع العلم ہونے اور شان و شوکت کے باوجود ضیعفو میں بیٹھتے، فقیروں کے ساتھ تواضع سے پیش آتے، بڑوں کی عزت، چھوٹوں پر شفقت فرماتے، سلام کرنے میں پہل کرتے، طالب علموں اور مہمانوں کے ساتھ کافی دیر بیٹھتے،بلکہ ان کی لغزشوں اور گستاخیوں کو در گزر فرماتے. (اخبار الاخیار. ص:45.46)۔

وصال پرملال: 11یا17ربیع الآخر561ھ/1166ء میں 90سال کی عمر میں آپ کی وفات ہوئی.آپ کا مزار مقدس بغداد شریف میں ہے۔

از قلم: محمدابوہریرہ رضوی مصباحی رام گڑھ

(ڈائریکٹر :مجلس علماے جھارکھنڈ و الجامعۃ الغوثیہ للبنات جھارکھنڈ)