علم تجوید نہایت ضروری ہے ⋆ از : رفیع احمد

علم تجوید نہایت ضروری ہے

قرآن مجید ہدیٰ للناس اور ہدیٰ للمتقین کی امتیازی شان و شوکت کے ساتھ نازل ہونے والی تمام آسمانی کتب و صحائف میں سے افضل ترین کتاب ہے جو تئس۲٣ برس میں حسب ضرورت نبی معظم شفیع محتشم (صلی للہ علیہ و سلم) پر نازل ہوئی۔

قرآن کریم وہ عظیم المرتبت کتاب ہے کہ جس کے محض الفاظ کی تلاوت بلا فہم بھی باعث اجر و ثواب،رضا الٰہی، قرب خدا وندی، اور عین عبادت ہے اس کی ہیئت و جلال عظمت و بزرگی کا اندازہ اس آیت مبارکہ سے لگا سکتے ہیں کہ :

خود باری تعالٰی نے ارشاد فرمایا “لَوْأَنْزَلْنَاھٰذَا القُرْآنَ عَلىٰ جَبَلِِ لَّرَأئْتَه خَاشِعًامُتَصَدِّعًامَنْ خَشْيَةِاللّٰهِ” (اگر ہم یہ قرآن کسی پہاڑ پر اتارتے تو ضرور تو اسے دیکھتا جھکا ہوا پاش پاش ہوتا اللہ کے خوف سے)۔

تمام کتابوں میں سب سے زیادہ چھپنے اور شائع ہونے والی،پڑھی اور سنی جانے والی کتاب کوئی اور نہیں بلکہ قرآن مقدس ہی ہے قرآن مقدس تمام علوم و فنون کا جامع ہے بس افہام و تفہیم کے لیے عقل سلیم اور عقائد صحیحہ کی ضرورت ہے۔

اللہ نے اس کلام بلیغ کو عربی زبان میں نازل فرمایا چناں چہ ارشاد باری تعالیٰ ہے ”إنَّا أَنْزَلْنَاه قُرْاٰنًا عَرَبِيًّا“(بیشک ہم نے اس کتاب کو قرآن کی شکل میں بزبان عربی اتارا)۔

جب قرآن مجید عربی زبان میں نازل کیا گیا تو ضروری ہے کہ اسے عربی لب و لہجے میں ہی پڑھا جائے جیسا کہ حضرت حذیفہ بن یمانن رضی اللہ عنہ نبی معظم صلی اللہ علیہ و سلم سے روایت کرتے ہیں کہ رسول کریم صلی اللہ علیہ وسلم نے ارشاد فرمایا ” إقرءوا القران بلحون العرب و اصواتھا“(قرآن کو عرب کے لہجوں اور آوازوں سے پڑھو)۔

اور حق بھی یہی ہے ورنہ جانب مخالف سے فساد معنی اور خلاف مقصود لازم آتا ہے مثلاً ”قُلْ ھُوْ اللّٰه اَحَد“ اس آیت مبارکہ کا ترجمہ ہے فرماؤ وہ اللہ ایک ہے اب اگر لفظ ”قل“ کے قاف کو باریک ادا کر کے ”کل“ پڑھیں تو (معاذاللہ) اس کا ترجمہ ہوگا کھاؤ اللہ ایک ہے ۔

اور یہی حال لفظ ”قلب اور کلب“کا ہے اول کا معنی دل اور دوسرے کا معنی کتّا ہے معلوم ہوا کہ قرآن مقدس کے معانی و مفاہیم کو سمجھنے اور حصول مقاصد کے لیے اس کو اسی طرح پڑھنا ضروری ہے جس طرح وہ نازل ہوا اور رضاء الٰہی بھی یہی ہے

چناں چہ فرمایا جاتا ہے ”إنَّ اللّٰهَ يُحِبَُ أَنْ يقرَأَ القُرآنَ كما أُنزِلَ“(بے شک اللہ تعالی اس بات کو پسند فرماتا ہے کہ قرآن مجید کو اسی طرح پڑھا جائے جس طرح وہ نازل کیا گیا) ۔

اور یہ بات ظاہر و باہر ہے کہ یہ علم تجوید سے ہی ممکن ہے لہذا علم تجوید کا حاصل کرنا ہر تالئ قرآن کے لیے نہایت ضروری ہے

لیکن آج ہمارا خصوصاً سنی مدارس کا حال یہ ہے کہ اس فن کے لیے کوئی خاص اہتمام و انصرام ہی نہیں ہے چند مدارس ہیں جہاں باقاعدہ و باظابطہ طور پر اس فن کی آبیاری ہوتی ہے لیکن صد حیف کہ جہاں سیکڑوں کی تعداد میں شعبہ درس نظامی و حفظ کے پڑھنے والے موجود ہوتے ہیں۔

وہاں شعبہ قرأت کی ایک بہت ہی مختصر جماعت ہوتی ہے ہم اپنے اجلاس و محافل میں لاکھوں روپے خرچ کرکے دور و دراز سے کئی خطبا، نقبا،اورشعرا کو مدعو کرتے ہیں لیکن ایک اچھے قاری کو نہیں بلاتے اکثر ہماری محافل کی ابتدا ایسے قاری کی قرأت سے ہوتی ہے جو بے چارے قاری کے قاف سے بھی ناآشنا ہوتے ہیں۔

قرآن سننے والے آج بھی موجود ہیں شرط ہے کہ سلیقے سے پڑھا جائے واقعی جب کوئی قاری صاحب قرأت اور تحسین سے متعلق جمیع حقوق کی ادائگی کے ساتھ قرآن مقدس کی تلاوت کرتا ہے تو سننے والے کے جسم کا ہرہر عضو اس کے ایک ایک کلمے اور ایک ایک حرف سے محظوظ ہو کر وحدانیت خدا کی گواہی دینے لگتا ہے

قرآن مقدس کی تلاوت دل کی تاریک وادیوں کو (نور کی موجوں میں نکھار کر) روشن اور منو کر دیتی ہے اس کے بے شمار فیوض و برکات ہیں جو کسی پر مخفی نہیں ہیں

قارئین سے مؤدبانہ التماس ہے کہ بے شمار نعمتوں اور برکتوں کو اپنے دامن میں سمیٹنے والے اس فن سے بے رُخی نہ کریں بلکہ اعلی سطح پر اس فن کی آبیاری کی کوشش کریں اللہ تعالی ہمیں اس فن سے بےلوث محبت اور وارفتگی کی توفیق عطا فرمائے اور اس کے دائمی فیوض برکات سے مالامال فرمائے۔

رفیع احمد

جامعہ احسن البرکات مارہرہ شریف