از قلم : حافظ ہاشم قادری مصباحی جمشیدپور لَبَّیک اَللَّھُمَّ لَبَّیک عزیمتِ حج
لَبَّیک اَللَّھُمَّ لَبَّیک عزیمتِ حج
حج اسلام کا پانحواں رکن ہے 9ھ میں حج فرض ہوا اس سے قبل مستحب تھا اسکی فرضیت قطعی ہے جو اسکی فرضیت کا منکر ہو کافر ہے پوری عمر میں صرف ایک بار حج فرض ہے اسکے علاوہ نفل ہے ۔حج کی فرضیت پر ارشاد باری تعالی ٰ ہے اِنَّ اَوّلَ بَیت وّ۔۔۔۔۔۔۔۔ الخ فَاِنَّ اللہ غنّی عنِ العٰلمین(القرآن: آلِ عمران 79) ۔
ترجمہ بیشک سب سے پہلا گھر جو لوگوں کے لیے (عبادت گاہ) بنایا گیا وہ گھر جو مکہ میں ہے وہ برکت والا اور دنیا بھر کے لیے رہنما ہے اس میں بہت سی نشانیاں ہیں ابراھیم علیہ السلام کے کھڑے ہونے کی جگہ اور جو اس میں چلا جاتا ہے وہ امن پاتا ہے اور اللہ کے لیے لوگوں پر اس کا حج فرض ہے ان پر جو وہاں پہنچنے کی طاقت رکھتے ہوں جو منکر ہو تو اللہ کو بھی کسی کی کچھ پرواہ نہیں (کنزالایمان) ۔
تفسیر ابنِ عباس میں آیت بالا کی تفسیر اس طرح بیان کی گئی ہے سب سے اوّل مسجد جو خدائے تعالیٰ کی عبادت کے لیے زمین پر بنائی گئی ہے وہ ہے جو مکہ میں ہے یعنی کعبہ شریف وہ مبارک گھر ہے یعنی اس میں مغفرت و رحمت ہے اور سارے جہاں کے لیے سیدھی راہ ہدایت کی بنیاد ہے سب رسولوں ،ولیوں ،مسلمانوں کی قبلہ گاہ ہے
حج کو دنیاوی سفر یاسیر سپاٹے کی طرح نہ لیا جائے انسانی مدارج کو وقار بخشنے کا نظامِ الہی ہے حج صرف حرمین طیبین کا سفر ہی نہیںہے دنیا و ما فیہھا کی ساری نعمتیں جمع کرنے کا مقدس موقع ہے۔
حضور ﷺ نے ارشاد فرمایا جو کوئی حج کیلئے گھر سے نکلا اور راہ میں موت آجائے اس کے لیے قیامت تک ایک حج ایک عمرہ ہر سال لکھا جاتا ہے اور جو کوئی مکہ معظمہ و مدینہ منورہ میں انتقال کر جائے وہ قیامت کے دین حساب و کتاب سے پاک ہے (کیمائے سعادت)۔
محسن کا ئنات ﷺ کا فرمان عالی شان ہے جس شخص نے (حج فرض تھا اور باوجود استطاعت کے) حج نہ کیا اور مر گیا اس سے کہہ دو کہ یہودی مرے یا نصرانی مرے (ترمذی )۔
ایسا حا جی جو دورانِ حج اللہ تعالیٰ کی نافرمانی سے اپنے کو بچائے رکھا وہ گناہوں سے ایسا پاک ہو جاتا ہے کہ جیسا شکم مادر سے پیدا ہونے کے دن پاک و طاہر تھا (بخاری و مسلم) ۔
حج ایک اہم عبادت ہے تفریحی سفر نہیں کہ جب دل کہے گا اور ہم اپنی سہولت و ضرورت دیکھیں گے تب ہی حج کو جائیں گے ،من مانی کی اجازت شریعت نہیں دیتی جیسے ہی آدمی صاحب استطاعت ہوا اسی وقت اس پر حج فرض ہو جاتا ہے، اگر وہ حج کو نہیں جاتا ہے تو گناہ گار ہوتا ہے
جب حج کرنے کے لائق ہو جائے تو حج فرض ہوجاتا ہے یعنی اسی سال میں اور اب دیر کرنے میں گناہ ہے اور کئی برس نہ گیا تو گنہگار ہے اور اسکی گواہی مقبول نہیں لیکن جب بھی کریگا قضا نہیں ہوگا (قانون شریعت) ۔
حج کے تعلق سے یہ بات دماغ سے نکال دینا چاہئے کہ سارے بچوں کی شادی ہو جائے، خود بوڑھا ہو جائے پھر چلیں حج کرنے ،نہ جانے آگے کیا حالات آئیں کمال و زوال زندگی کے ساتھ لگا رہتا لہٰذا حج فرض ہو تے ہی پہلے حج کرلے(3) حج کے سفر میں مدینہ منورہ و روضئہ اقدس کی حاضری ضروری ہے ۔
| کعبہ تو دیکھ چکے، کعبے کا کعبہ دیکھو | حاجیو آﺅ شہنشاہ کا روضہ دیکھو |
حضور ﷺ کے روضہ اقدس کی زیارت کر نا دین و دنیا میں سر خروئی کا موجب ہے اسکی نسبت خود رسول ﷺ کا ارشاد ہے ، حدیث مَن وَّ جَدَ سَعَتہََ وَّ لَم’ یَزُر نِی فَقَد جَفَانِی جس کو مدینہ تک پہنچنے کی وسعت ہو اور وہ میری زیارت کو نہ آئے (یعنی صرف حج کر کے چلا جائے ) اس نے میرے ساتھ بہت بے مروَّتی کی نیز آپ نے فرمایا مَن زَرا قَبرِی وَ جَبَت لَہُ شَفَاعَتی جس نے میری قبر کی زیارت کی اس کے لیے میری شفاعت لازمی ہو گئی
آپ نے فرمایا حدیث جس نے میری وفات کے بعد میری زیارت کی ایسا ہی ہے جیسا کے اس نے میری زندگی میں میری زیارت کی علما لکھتے ہیں وہ مقام جو آنحضرت ﷺ کے جَسد اَطہر سے مُتّصل ہے عرش و کرسی سے بھی افضل ہے ہر حاجی کے لیے ضروری ہے کہ حج سے فارغ ہو کر روضئہ اقدس کی زیارت کو ضرورجائے
اگر ممکن ہو تو سواری سے اتر کر جائے ،ننگے پاﺅں پیدل روتا ہوا عاجزی سے چلے، درود شریف کثرت سے پڑھے الصلوٰةُ و السلام عَلَیکَ یاَ رَسُولّ اللہ عرض کرے مدینہ پاک داخل ہونے سے پہلے غُسل کرے ورنہ وضو کرکے صاف ستھرے کپڑے پہنے، خوشبو لگا ئے اور ادب سے شہر میں داخل ہو اور کثرت سے درود پاک پڑھیں
۔(4) تمام نمازیں مسجد نبوی میں ادا کریں ، رات کے اکثر حصہ میں بیدار رہ کرعبادت کریں ، مسجد نبوی میں بیٹھ کر قرآن مجید آہستہ آواز سے پڑھے، مسجد نبوی میں اکثر اعتکاف کریں ،ممکن ہو تو ہر ستون کے پیچھے نماز پڑھےں ،دو رکعت ، روضئہ اطہر پر اکثر نگاہ ڈالتا رہے
سرکار کی بارگاہ میں کثرت سے درودو سلام پیش کریں، دعائیں مانگےں، اپنے لیے تمام مومنین کے لیے اور اس ناچیز کے لیے بھی دعا مانگےں، اللہ آپ کے حج کو قبول اور مقبول فرمائے اور آپ کی حاضری کو قبول فرمائے آمین ثم آمین
اس کو بھی پڑھیں : ہم خود کو سنبھالیں اورقوم کی صالح رہ نمائی کریں از طارق انور مصباحی
حافظ محمد ہاشم قادری صدیقی مصباحی
خطیب و امام مسجد ہا جرہ رضویہ
اسلام نگر کپالی وایا مانگو
جمشیدپور جھارکھنڈ
پن کوڈ 831020
- رابطہ : 0938637963
- Amazon
- Havells
- Flipkart
- AliExpress
