چراغ رضویت اور میرے تاج شریعت

عالم اسلام کو سالانہ پانچواں  عرس حضورتاج الشریعہ علیہ الرحمہ مبارک ہو۔ اس حسین موقع پر افکار رضا کے پیلٹ فارم سے شائع ہونے والے فقیر قادری کے اس مضمون کو ضرور پڑھیے۔ جس کا عنوان ہے۔ چراغ رضویت اور میرے تاج شریعت اور اگر کسی  وجہ سے آپ بریلی شریف نہیں پہچ پا رہے ہیں تو  اپنے اپنے گھروں میں جس کی جیسی سہولت ہو وہ ضرور فاتحہ خوانی کرائیں

چراغ رضویت اور میرے تاج شریعت

نگاہ مفتی اعظم کی ہے یہ جلوہ گری

چمک رہا ہے جو اختر ہزار آنکھوں میں

تاریخ اسلام میں ایسے بے شمار نام محفوظ ہیں جن کے کارہائے نمایاں رہتی دنیا تک یاد رکھے جائیں گے لیکن جب ذکر سیدنا اعلیٰ حضرت عظیم البرکت عظیم المرتبت امام احمد رضا بریلوی رضی اللہ تعالی عنہ کا آجائے تو تاریخ ڈھونڈتی ہے کہ ان جیسا دوسراکوئی ایک ہی اسے اپنے دامن میں مل جائے ۔ کوئی کسی فن کا امام ہے تو کوئی کسی علم کا ماہر لیکن سیدنا اعلیٰ حضرت رضی اللہ تعالی عنہ ہر علم ، ہر فن کے آفتاب و ماہتاب ہیں

جس سمت دیکھئے وہ علاقہ رضا کا ہے

جہاں مالک قدیر نے آپ کو ،نامور آباؤ اجداد اور معزز و مقدس قبیلہ میں پیدا فرمایا وہیں آپ کی اولاد اورخاندان میں بھی بے شمار بے مثال ولاجواب افراد پیدا فرمائے ۔ استاد زمن ، حجۃ الاسلام ، مفتئ اعظم ،مفسر اعظم ،حکیم الاسلام، ریحان ملت ، صدر العلماء ، امین شریعت جس کسی کو دیکھ لیجئے ہر ایک اپنی مثال آپ ہے ۔

کوئی ہے حجۃالاسلام کوئی ہے مفتی اعظم

یہ اونچا خاندان ہے کس کا امام احمد رضا خان کا

انہی میں ایک نام سر سبز وشاداب باغِ رضا کے گل شگفتہ ، روشن روشن فلک رضا کے نیر تاباں رازی دوراں، غزالی زماں، اپنے عصر کے بو حنیفہ، عمدۃ المحدثین، رئیس المفسرین، سند المفتیین، سید المحققین، سلطان المدرسین، امام العارفین والکاملین زبدۃ الواصلین، شیخ الاسلام والمسلمین، قاضی القضاۃ فی الہند ، وارث علوم اعلیٰ حضرت وارث فیوض و برکات اعلیٰ حضرت ہمشبیہ حجۃالاسلام جانشین حضورمفتئ اعظم ،حضور تاج الشریعہ حضرۃ العلام الحاج الشاہ مفتی محمد اختر رضا خاں قادری رحمۃ الباری کا بھی ہے ۔

حضور تاج الشریعہ رحمۃ اللہ تعالیٰ علیہ مفسر اعظم ہند حضرت علامہ مفتی محمد ابراہیم رضا خاں قادری جیلانی کے لخت جگر ، سرکار مفتئ اعظم ہند علامہ مفتی محمد مصطفی رضاخاں قادری نوری کے سچے جانشین ،حجۃ الاسلام حضرت علامہ مفتی محمد حامد رضا خاں قادری رضوی کے مظہر اور سیدی اعلیٰ حضرت امام اہلسنّت مجدد دین و ملت الشاہ امام احمد رضا خاں قادری برکاتی بریلوی کی برکات و فیوضات کا منبع اور ان کے علوم و روایتوں کے وراث و امین تھے۔

ان عظیم نسبتوں کا فیضان آپ کی شخصیت میں اوصاف حمیدہ اور اخلاق کریمانہ کی صورت میں جھلک رہاتھا ۔استاذ الفقہأ حضرت علامہ مفتی عبد الرحیم صاحب بستوی رحمۃ اللہ علیہ صدر مفتی مرکزی دارالافتاء بریلی شریف حضورتاج الشریعہ علیہ الرحمہ پر ان عظیم ہستیوں کے فیضان کی بارشوں کاتذکرہ ان الفاظ میں کرتے ہیں:

” سب ہی حضرات گرامی کے کمالات علمی و عملی سے آپ کو گراں قدر حصہ ملا ہے ۔ فہم و ذکا ،قوت حافظہ و تقویٰ سیدی اعلیٰ حضرت سے ،جودت طبع و مہارت تامہ (عربی ادب ) میں حضور حجۃ الاسلام سے ،فقہ میں تبحر و اصابت سرکار مفتئ اعظم ہند سے ، قوت خطابت و بیان والد ذی وقار مفسر اعظم ہند سے یعنی وہ تمام خوبیاں آپ کووارثتہً حاصل ہیں جن کی رہبر شریعت و طریقت کو ضرورت ہوتی ہے ۔ ” [پیش گفتار، شرح حدیث نیت/صفحہ:٤ ]۔

جانشین رضا شاہ اختر رضا

فخر اہل سنن شاہ اختر رضا

ہیں میری زندگی شاہ اختر رضا

ان کا سایہ سروں پر رہے دائما

ان کی نورانی صورت پہ لاکھوں سلام

مصطفیٰ جان رحمت پہ لاکھوں سلام

ولادت باسعادت

حضور تاج الشریعہ علیہ الرحمہ کی ولادت باسعادت ٢٦/محرم الحرام ١٣٦٢ھ بمطابق ٢/فروری ١٩٤٣ء بروز منگل ہندوستان کے شہر بریلی شریف کے محلہ سوداگران میں ہوئی ۔

اسم گرامی

آپ کااسم گرامی ”محمداسماعیل رضا” جبکہ عرفیت ”اختر رضا” ہے ۔ اورآپ اخترواپنا تخلص استعمال فرماتھے۔ آپ کے القابات میں تاج الشریعہ، سلطان الفقہاء، جانشین مفتئ اعظم، وارث علوم اعلیٰ حضرت شیخ الاسلام و المسلمین زیادہ مشہور تھے۔

شجرہ نسب

اعلیٰ حضرت امام اہلسنّت تک آپ کا شجرہ نصب یوں ہے۔ محمد اختررضا خاں قادری ازہری بن محمد ابرہیم رضا خاں قادری جیلانی بن محمد حامد رضا خاں قادری رضوی بن امام احمد رضا خاں قادری برکاتی بریلوی رضی اللہ تعالٰی عنہم اجمعین

آپ ٥/ بھائی اور٣/بہنیں ۔٢/بھائی آپ سے بڑے ۔ ریحان ملت مولانا ریحان رضا خاں قادری اورتنویر رضا خاں قادری (آپ پچپن ہی سے جذب کی کیفیت میں غرق رہتے تھے بالآ خر مفقود الخبرہوگئے) اور٢/ آپ سے چھوٹے ہیں۔ ڈاکٹر قمر رضا خاں قادری، اورحضرت مولانا منان رضا خاں قادری جو ابھی الحمدللہ بقیدِ حیات ہیں اللہ پاک آپ کو لمبی عمر عطا فرمائے آمین۔

تعلیم و تربیت

جانشین مفتئ اعظم حضور تاج الشریعہ علیہ الرحمہ کی عمر شریف جب ٤/سال ،٤/ ماہ اور٤/ دن ہوئی توآپ کے والد ماجد مفسر اعظم ہند حضرت ابراہیم رضا خاں جیلانی رضی اللہ تعالی عنہ نے تقریب بسم اللہ خوانی منعقد کی ۔اس تقریب سعید میں ”یاد گار اعلیٰحضرت دارالعلوم منظر الاسلام” کے تمام طلبہ کو دعوت دی گئی۔ رسم بسم اللہ نانا جان تاجدار اہلسنّت سرکار مفتئ اعظم ہند محمد مصطفی رضاخاں نور ی نور اللہ مرقدہ نے ادا کرائی۔

 حضور تاج الشریعہ قدس سرہ العزیز نے ”ناظرہ قرآن کریم ”اپنی والدہ ماجدہ شہزادیئ حضور مفتی اعظم ہند سے گھر پرہی ختم کیا ،والدماجد سے ابتدائی اردو کتب پڑھیں۔ اس کے بعد والد بزرگوار نے ”دارالعلوم منظرالاسلام” میں داخل کرا دیا ، درس نظامی کی تکمیل آپ نے منظر الاسلام سے کی

اس کے بعد ١٩٦٣ء میں حضورتاج الشریعہ نور اللہ مرقدہ ”جامعۃ الازہر”قاہرہ ،مصرتشریف لے گئے ۔وہاں آپ نے ”کلیہ اصول الدین” میں داخلہ لیااورمسلسل تین سال تک” جامعہ ازہر، مصر” کے فن تفسیر و حدیث کے ماہر اساتذہ سے اکتساب علم کیا

تاج الشریعہ ١٩٦٦ء /١٣٨٦ھ میں جامعۃ الازہر سے فارغ ہوئے۔ اپنی جماعت میں اول پوزیشن حاصل کرنے پر آپ کواس وقت کے مصر کے صدر کرنل جمال عبدالناصر نے ”جامعہ ازہر ایوارڈ” پیش کیا اور ساتھ ہی سند سے بھی نوازا۔ [بحوالہ : مفتئ اعظم ہند اور ان کے خلفاء /صفحہ :١٥٠/جلد :١]۔

اساتذہ کرام

آپ کے اساتذہ کرام میں حضور مفتی اعظم الشاہ مصطفےٰ رضاخاں نوری بریلوی ، بحر العلوم حضرت مفتی سید محمد افضل حسین رضوی مونگیری،مفسر اعظم ہند حضرت مفتی محمد ابراہیم رضا جیلانی رضوی بریلوی،فضیلت الشیخ علامہ محمد سماحی ،شیخ الحدیث و التفسیر جامعہ ازہر قاہرہ، حضرت علامہ مولانا محمود عبدالغفار ،استاذالحدیث جامعہ ازہر قاہرہ، ریحان ملت ،قائداعظم مولانا محمد ریحان رضا رحمانی رضوی بریلوی، استاذ الاساتذہ مولانا مفتی محمد احمد عرف جہانگیر خاں رضوی اعظمی جنکا مزار اقدس صوبہ راجستھان کے مشہور شہر اودے پور میں مرجع خلائق بنا ہوا ہے کے اسمائے گرامی شامل ہیں۔ [مفتئ اعظم ہند اور ان کے خلفاء /صفحہ :١٥٠/جلد :١]۔

ازدواجی زندگی

جانشین مفتی اعظم کا عقد مسنون حکیم الاسلام مولانا حسنین رضا بریلوی رضی اللہ تعالی عنہ کی دختر نیک اخترکے ساتھ ٣/نومبر١٩٦٨ء/ شعبان المعظم١٣٨٨ھ بروز اتوار کو محلہ کا نکر ٹولہ شہر کہنہ بریلی میں ہوا۔ آپ کے ایک صاحبزادہ مخدوم گرامی جانشین حضور تاج الشریعہ قاضی القضاۃ فی الہند قائد ملت حضرت علامہ مولانا مفتی محمد عسجد رضا قادری بریلوی اور پانچ صاحبزادیاں ہیں۔

درس وتدریس

حضور تاج الشریعہ قدس سرہ العزیز نے تدریس کی ابتدادارالعلوم منظر اسلام بریلی سے ١٩٦٧ء میں کی۔ ١٩٧٨ء میں آپ دارالعلوم کے صدر المدرس اور رضوی دارالافتاء کے صدر مفتی کے عہدے پر فائز ہوئے ۔ درس و تدریس کا سلسلہ مسلسل بارہ سال جاری رہا

لیکن حضور تاج الشریعہ نور اللہ مرقدہ کی کثیر مصروفیات کے سبب یہ سلسلہ مستقل جاری نہیں رہ سکا ۔ لیکن تادم حیات آپ مرکزی دارالافتاء بریلی شریف میں ” تخصص فی الفقہ ” کے علمائے کرام کو ”رسم المفتی،اجلی الاعلام” اور ”بخاری شریف ” اور دیگر کتب کا درس دیتے رہے۔

بیعت وخلافت

حضورتا ج الشریعہ کو بیعت و خلافت کا شرف سرکار مفتئ اعظم علیہ الرحمہ سے حاصل تھا۔ سرکار مفتئ اعظم ہند نے بچپن ہی میں آپ کوبیعت کا شرف عطا فرمادیا تھااور صرف ١٩/ سال کی عمر میں١٥/جنوری١٩٦٢ء/١٣٨١ ھ کو تمام سلاسل کی خلافت و اجازت سے نوازا۔

علاوہ ازیں آپ کو خلیفہ اعلیٰ حضرت برہان ملت حضرت مفتی برہان الحق جبل پوری، سید العلماء حضرت سید شاہ آل مصطفی برکاتی مارہروی،احسن العلماء حضرت سید حیدر حسن میاں برکاتی ،والد ماجد مفسر اعظم علامہ مفتی ابراہیم رضا خاں قادری سے بھی جمیع سلاسل کی اجازت و خلافت حاصل ہے ۔ [تجلیّات تاج الشریعہ / صفحہ: ١٤٩ ]۔

بارگاہ مرشد میں مقام

حضور تاج الشریعہ علیہ الرحمہ کو اپنے مرشد برحق ،شہزادہ اعلیٰ حضرت تاجدار اہل سنّت امام المشائخ مفتئ اعظم ہند ابو البرکات آل رحمن حضرت علامہ مفتی محمد مصطفی رضاخاں نوری رضی اللہ تعالیٰ عنہ کی بارگاہ میں بھی بلند مقام حاصل تھا

سرکار مفتی اعظم رضی اللہ تعالی عنہ کو آپ سے بچپن ہی سے بے انتہا توقعات وابستہ تھیں جس کا اندازہ ان کے ارشادات عالیہ سے لگایا جاسکتاہے جو مختلف مواقع پر آپ نے ارشاد فرمائے : ” اس لڑکے (حضور تاج الشریعہ نور اللہ مرقدہ) سے بہت اُمید ہے۔”

سرکار مفتی اعظم ہند نے دارالافتاء کی عظیم ذمہ داری آپ کو سونپتے ہوئے فرمایا: ”اختر میاں اب گھر میں بیٹھنے کا وقت نہیں، یہ لوگ جن کی بھیڑ لگی ہوئی ہے کبھی سکون سے بیٹھنے نہیں دیتے ، اب تم اس کام کو انجام دو، میں تمہارے سپرد کرتا ہوں۔”لوگوں سے مخاطب ہو کر مفتی اعظم نے فرمایا:”آپ لوگ اب اختر میاں سلمہ، سے رجوع کریں انہیں کو میرا قائم مقام اور جانشین جانیں۔ ” حضور مفتی اعظم نے اپنی حیات مبارکہ کے آخری دور میں حضورتاج الشریعہ نور اللہ مرقدہ کوتحریراًاپنا قائم مقام و جانشین مقرر فرمایا تھا۔

بتاؤں کیسے کتنے پر ضیاء تاج شریعت ہیں

شبیہ اعلیٰ حضرت با خدا تاج شریعت ہیں

نبی کے عشق کا جلوہ نظر آتا ہے چہرے میں

سراپا پیکر صدق و صفا تاج شریعت ہیں

شجاعت کے ،عدالت کے ،سخاوت کے ہیں وہ پیکر 

علی ، فاروق ، عثمان کی ادا تاج شریعت ہیں

ہر اک لمحہ ،ہر اک ساعت، شب و دن دیکھئے چل کر 

ہمیشہ محو ِ عشق مصطفی تاج شریعت ہیں

حبیب ناتواں کو حشر کی گرمی کا کیوں غم ہو

شہ بطحاکے دامن کی ہوا تاج شریعت ہیں

فتویٰ نویسی

١٨١٦ء میںروہیلہ حکومت کے خاتمہ ،بریلی شریف پرانگریز وں کے قبضہ اور حضرت مفتی محمد عیوض صاحب کے روہیلکھنڈ(بریلی) ٹونک تشریف لے جانے کے بعد بریلی کی مسند افتاء خالی تھی ۔ایسے نازک اور پر آشوب دور میں امام العلماء علامہ مفتی رضا علی خاں نقشبندی رضی اللہ تعالی عنہ نے بریلی کی مسند افتاء کورونق بخشی ۔ یہیں سے خانوادہ رضویہ میں فتاویٰ نویسی کی عظیم الشان روایت کی ابتداء ہوئی۔ [بحوالہ:مولانا نقی علی خاں علیہ الرحمہ حیات اور علمی وادبی کارنامے/ صفحہ ٧٨ ]۔

لیکن مجموعہ فتاویٰ بریلی شریف میں آپ کی فتویٰ نویسی کی ابتداء ١٨٣١ء لکھی ہے ۔ (غالباً درمیانی عرصہ انگریز قابضوں کی ریشہ دوانیوں کے سبب مسند افتاء خالی ہی رہی) الحمدللہ! ١٨٣١ء سے آج ٢٠٢٠ء تک یہ تابناک سلسلہ جاری و ساری ہے یعنی خاندان رضویہ میں فتاویٰ نویسی کی ایمان افروز روایت تقریباًً٢٠٠/ سال سے مسلسل چلی آرہی ہے ۔

امام الفقہأ ،حضرت علامہ مفتی محمد رضا علی خاں قادری بریلوی،امام المتکلمین ،حضرت علامہ مولانامحمد نقی علی خاں قادری برکاتی،اعلیٰ حضرت ،مجدد دین وملت ،حضرت علامہ مولانا مفتی محمد احمد رضا خاں قادری برکاتی ،شہزادۂ اعلیٰ حضرت ،حجۃ الالسلام ،جمال الانام حضرت علامہ مولانا مفتی حامد رضا خاں قادری رضوی

شہزادۂ اعلیٰ حضرت تاجدار اہل سنت ،مفتئ اعظم ہند ،علامہ مولانا مفتی محمد مصطفی رضا خاں قادری نوری، نبیرہ اعلیٰ حضرت ،مفسر اعظم ہند حضرت علامہ مفتی ابراہیم رضا خاں قادری رضوی، مفکر اعظم حضور ریحان ملت مفتی ریحان خاں حضور رحمانی میاں قاضی القضاۃ فی الہند ،تاج الشریعہ ، حضرت علامہ مولانا مفتی اختر رضا خاں قادری ازہری رحمۃ اللہ علیہ ،١٩٦٧ء سے تادم تحریر٢٠١٨/اس خدمت کو بحسن و خوبی سرانجام دیا۔ [بحوالہ: فتاویٰ بریلی شریف /صفحہ:٢٢]۔

اور اب آپ کے جانشین حضور قائد ملت حضرت علامہ مفتی محمد عسجد رضا قادری دام ظلہ، علینا اور بھی خانوادہ کے کئی نوجوان علماء فضلاء فتاویٰ نوسی کر رہے ہیں اللہ پاک کی بارگاہ اقدس میں دعا ہے کہ یہ مبارک سلسلہ صبح قیامت تک جاری وساری رہے۔

حضورتاج الشریعہ نور اللہ مرقدہ خود اپنے فتوی نویسی کی ابتداء سے متعلق فرماتے ہیں:”میں بچپن سے ہی حضرت (مفتی اعظم) سے داخل سلسلہ ہو گیا ہوں، جامعہ ازہر سے واپسی کے بعد میں نے اپنی دلچسپی کی بناء پر فتویٰ کا کام شروع کیا۔ شروع شروع میں مفتی سید افضل حسین صاحب علیہ الرحمتہ اور دوسرے مفتیانِ کرام کی نگرانی میں یہ کام کرتا رہا

اور کبھی کبھی حضرت کی خدمت میں حاضر ہو کر فتویٰ دکھایا کرتا تھا۔ کچھ دنوں کے بعد اس کام میں میری دلچسپی زیادہ بڑھ گئی اور پھر میں مستقل حضرت کی خدمت میں حاضر ہونے لگا۔ حضرت کی توجہ سے مختصر مدت میں اس کام میں مجھے وہ فیض حاصل ہوا کہ جو کسی کے پاس مدتوں بیٹھنے سے بھی نہ ہوتا ۔” [مفتئ اعظم ہند اور ان کے خلفاء صفحہ :١٥٠/جلد :١]۔

حضورتاج الشریعہ نور اللہ مرقدہ کے فتاویٰ سارے عالم میں سند کا درجہ رکھتے ہیں۔ وہ دقیق و پیچیدہ مسائل جو علماء اور مفتیان کرام کے درمیان مختلف فیہ ہوں ان میں حضرت کے قول کو ہی فیصل تسلیم کیا جاتا اور جس فتوے پر آپ کی مہر تصدیق ثبت ہو خواص کے نزدیک بھی وہ انتہائی معتبر ہوتا

حضورتاج الشریعہ نور اللہ مرقدہ کے فتاویٰ سے متعلق جگرگوشہ صدر الشریعہ، بدرالطریقہ، محدث کبیر حضرت علامہ مفتی ضیاء المصطفیٰ اعظمی دامت برکاتہم العالیہ اللہ پاک آپ کو عمر خضر عطا فرمائے رقم طراز ہیں: ”تاج الشریعہ کے قلم سے نکلے ہوئے فتاویٰ کے مطالعہ سے ایسا لگتا ہے ہم اعلیٰ حضرت امام احمد رضا رضی اللہ تعالی عنہ کی تحریر پڑھ رہے ہیں آپ کی تحریرمیں دلائل اور حوالہ جات کی بھر مار سے یہی ظاہر ہوتاہے ۔” [حیات تاج الشریعہ/صفحہ٦٦]۔

حج وزیات

حضور تاج الشریعہ نور اللہ مرقدہ اپنی حیات مبارکہ میں بہت مرتبہ حج وعمرہ کی زیارت حرمین شریفین زادہ اللہ شرفا وتعظیما سے مشرف ہوئے۔ آپ نے پہلی مرتبہ حج وزیارت کی سعادت ١٤٠٣ھ/ ١٩٨٣ء میں حاصل کی ۔ دوسری مرتبہ ١٤٠٥ھ/ ١٩٨٥ء اور تیسری مرتبہ ١٤٠٦ھ/١٩٨٦ء میں اس سعادت عظمیٰ سے مشرف ہوئے ۔جبکہ چوتھی مرتبہ ١٤٢٩ھ/٢٠٠٨ء میں آپ نے حج بیت اللہ ادا فرمایا۔ نیز متعدد مرتبہ آپ کو سرکار عالی وقار کی بارگاہ بے کس پناہ سے عمرہ کی سعادت بھی عطا ہوئی ۔

اعلائے کلمۃ الحق

احقاق حق و ابطال باطل ،خانوادۂ رضویہ کی ان صفات میں سے ہے جس کا اعتراف نہ صرف اپنوں بلکہ بیگانوں کو بھی کرنا پڑا۔یہاں حق کے مقابل نہ اپنے پرائے کا فرق رکھا جاتا ہے نہ امیر و غریب کی تفریق کی جاتی ہے۔ سیدی اعلیٰ حضرت رضی اللہ تعالی عنہ کا دور تو تھا ہی فتنوں کا دور ہر طرف کفرو الحاد کی آندھیاں چل رہی تھیں۔

لیکن علم بردار حق سیدی اعلیٰ حضرت نے کبھی باطل کے سامنے سر نہ جھکایاچاہے ذبحِ گائے کا فتنہ ہویاہندو مسلم اتحاد کا ، تحریک ترک موالات ہو یا تحریک خلافت فتنۂ دیوبندیت، رافضیت، قادیانیت وہابیت، نیچریت ، پرویزیت ، غیر مقلدیت،وغیرہ یہ مرد مومن آوازہ حق بلند کرتا ہی رہا۔

سرکارمفتئ اعظم کی حق گوئی وبے باکی بھی تاریخ کا درخشندہ باب ہے شدھی تحریک کا زمانہ ہو یانسبندی کاپر خطر دور ہوآپ نے علم حق کبھی سرنگوں نہ ہونے دیا۔ اللہ رب العزت نے جانشین مفتی اعظم کواپنے اسلاف کا پرتو بنایاہے

آپ کی حق گوئی اور بے باکی بھی قابل تقلید ہے۔ وقتی مصلحتیں،طعن و تشنیع ، مصائب وآلام یہاں تک کہ قید و بند کی صعوبتیں بھی آپ کو راہ حق سے نہ ہٹا سکی ۔آپ نے کبھی اہل ثروت کی خوشی یا حکومتی منشاء کے مطابق فتویٰ نہیں تحریر فرماے، ہمیشہ صداقت و حقانیت کا دامن تھامے رکھا ۔

اس راہ میں کبھی آپ نے اپنے پرائے ، چھوٹے بڑے کافرق ملحوظ خاطر نہیں رکھا۔ ہر معاملہ میں آپ اپنے آباء و اجدادکی روشن اور تابناک روایتوں کی پاسداری فرماتے رہے ۔

شیخ عالم حضرت علامہ سیدشاہ فخر الدین اشرف الاشرفی کچھوچھوی زیب سجادہ کچھوچھہ مقدسہ تحریر فرماتے ہیں: ”علامہ اختر رضا(حضورتاج الشریعہ کا) ۔۔۔۔۔۔۔۔۔۔۔۔ ہر حال میں باد سموم کی تیز و تند،غضبناک آندھیوں کی زد میں بھی استقامت علی الحق کا مظاہر ہ کرنا اور ثابت قدم رہنا یہ وہ عظیم وصف ہے جس نے مجھے کافی متاثر کیا۔” [تجلیّاتِ تاج الشریعہ /صفحہ :٢٥١]۔

اس سلسلہ میں ٢/ واقعات درج ذیل ہیں ۔تیسری مرتبہ١٩٨٦ء/١٤٠٦ھ حج کے موقع پرسعودی حکومت نے آپ کو بیجا گرفتار کرلیااس موقع پر آپ نے حق گوئی و بے باکی کاجومظاہرہ کیا وہ آپ ہی کاحصہ ہے۔ سعودی مظالم کی مختصرسی جھلک خود حضور تاج الشریعہ کی زبانی ملاحظہ فرمائیں:”مختصر یہ کہ مسلسل سوالات کے باوجود میرا جرم میرے بار بار پوچھنے کے بعد بھی مجھے نہ بتایا بلکہ یہی کہتے رہے کہ : ” میرا معاملہ اہمیت نہیں رکھتا” ۔

لیکن اس کے باوجود میری رہائی میں تاخیر کی اور بغیر اظہار جرم مجھے مدینہ منورہ کی حاضری سے موقوف رکھااور ۱۱/ دنوں کے بعد جب مجھے جدہ روانہ کیا گیا تو میرے ہاتھوں میں جدہ ائیر پورٹ تک ہتھکڑی پہنائے رکھی اور راستے میں نماز ظہر کے لیے موقع بھی نہ دیا گیا اس وجہ سے میری نماز ظہر قضاہو گئی۔” [مفتئ اعظم ہند اور ان کے خلفاء صفحہ :١٥٠/جلد :١]۔

اپنے اشعار میں حضور تاج الشریعہ علیہ الرحمہ نے اسی واقعہ کا ذکر اس طرح فرمایا ہے ۔

نہ رکھا مجھ کو طیبہ کی قفس میں اس ستم گر نے

ستم کیسا ہوا بلبل پہ یہ قید ستم گر میں

ستم سے اپنے مٹ جاؤ گے تم خود اے ستمگارو

سنو ہم کہہ رہے ہیں بے خطرہ دورِستم گر میں

سعودی حکومت کے اس متعصب رویہ ،حضور تاج الشریعہ علیہ الرحمہ کی بیجا گرفتاری اور مدینہ طیبہ کی حاضری سے روکے جانے پر پورے عالم اسلام میں غم و غصہ کی لہر دوڑ گئی ، مسلمانان اہل سنت کی جانب سے ساری دنیا میں سعودی حکومت کے خلاف احتجاجات کا سلسلہ شروع ہوگیا  اخبارات و رسائل نے بھی آپ کی بےجا گرفتاری کی شدید مذمت کی۔

آخر کاراہل سنت و جماعت کی قربانیاں رنگ لائیں ، سعودی حکومت کو سر جھکانا پڑا ،اس وقت کے سعودی فرمانروا شاہ فہد نے لندن میں یہ اعلان کیا کہ ”حرمین شرفین میں ہر مسلک کے لوگوں کو ان کے طریقے پر عبادات کرنے کی آزادی ہو گی ” ۔

نیز آپ کو زیارت مدینہ طیبہ اور عمرہ کے لیے ایک ماہ کا خصوصی ویزہ بھی دیا۔ اس معاملہ میں قائد اہلسنت علامہ شاہ احمد نورانی اور قائد اہلسنّت حضرت علامہ ارشد القادری رضی اللہ تعالی عنہما کی کاوشیں قابل ذکر ہیں۔

خلیفہ سرکار مفتی اعظم ہند ، علامہ بدر الدین احمد قادر ی حضور تاج الشریعہ علیہ الرحمہ کی حق گوئی سے متعلق رقم طراز ہیں : ”حضرت سرکار خواجہ غریب نواز کے سالانہ عرس پاک کے موقع پر میں اجمیر مقدس حاضر ہوا، چھٹویں رجب ١٤٠٩ھ بروز دوشنبہ مبارکہ (پیر) مطابق ١٣/فروری١٩٨٩ء کو حضرت سید احمد علی صاحب قبلہ خادم درگاہ سرکار خواجہ صاحب کے کاشانہ پر قل شریف کی محفل منعقد ہوئی 

محفل میں حضرت علامہ مولانا اختر رضاازہری اور حضرت مولانا مفتی رجب علی صاحب قبلہ ساکن نانپارہ بہرائچ شریف نیز دیگر علماء کرا م موجود تھے ۔ قل شریف کے اس مجمع میں سرکار شیر بیشہ اہلسنّت امام المناظرین حضور مولانا علامہ محمد حشمت علی خاں علیہ الرحمۃ والرضوان کے شاہزادے مولانا ادریس رضا خاں صاحب تقریر کر رہے تھے

اثنائے تقریر میں مولانا موصوف کی زبان سے یہ جملہ نکلا کہ:” ہمارے سرکار پیارے مصطفی اپنے غلاموں کو اپنی کالی کملی میں چھپائیں گے ۔ ” فوراً حضورتاج الشریعہ علیہ الرحمہ نے مولانا موصوف کو ٹوکتے ہوئے فرمایا کہ (کالی کملی کے بجائے )نوری چادر کہو۔

یہ شرعی تنبیہ سنتے ہی مولانا موصوف نے اپنی تقریر روک کر پہلے حضور تاج الشریعہ کی تنبیہ کو سراہا ، بعدہ، بھرے مجمع میں یہ واضح کیا کہ ” کملی ” تصغیر کا کلمہ ہے جس کو سرکار صلی اللہ علیہ وسلم کی طرف نسبت کرکے بولنا ہر گز جائز نہیں اور چوں کہ میری زبان سے یہ خلاف شریعت کلمہ نکلا اس لیے میں بارگاہ الٰہی میں اس کلمہ کے بولنے سے توبہ کرتاہوں 

اللہ تعالیٰ مجھے معاف فرمائے ۔ (ھٰذَا اَوْکَمَا قَالَ )پھر توبہ کے بعد موصوف نے اپنی بقیہ تقریر پوری کی ۔ ” [عطیہ ربانی در مقالہ نورانی ،صفحہ :٢٣،٢٤]۔ مولانا موصوف بعد میں حضرت کے باغی ہوگئے اور ابھی تک ہیں اللہ پاک ہدایت عطا فرمائے آمین

جس طرح بے مثال ہے اختر رضا کی ذات

اس طرح باکمال ہے اختر رضا کی بات

فلک رضا کا اختر کامل ہے دوستو! ۔

کس درجہ پُرضیاء ہے اختر رضا کی ذات

چپ رہ رقیب روسیہ بدخواہ بدنصیب

سونے کے مول تلتی ہے آخر کہیں پہ دھات

کیوں کر نہ گونجے دھر میں نغمہ رضا کا پھر

فکر رضا کی بین ہے اختر رضا کے ہاتھ

عرفان گرچہ عارفِ راہِ سخن نہیں

کہہ دی وفور عشق میں اختر رضا کی بات

زہد و تقویٰ

حضورتاج الشریعہ علیہ الرحمہ اخلاق حسنہ اور صفات عالیہ کا مرقع تھے۔حکمت و دانائی ، طہارت و پاکیزگی ،بلندیئ کردار،خوش مزاجی و ملنساری ،حلم و بردباری ، خلوص و للّٰہیت،شرم و حیا،صبر و قناعت ،صداقت و استقامت بے شمار خوبیاں آپ کی شخصیت میں جمع تھیں ،وہیں آپ زہد و تقویٰ کا بھی مجسم پیکر تھے۔ شریغت و طریقت کے جامع تھے۔ مجمع البحرین تھے۔آپ کے تقویٰ کی ایک جھلک ان واقعات میں ملاحظہ کی جاسکتی ہے۔

مولانا غلام معین الدین قادری (پرگنہ ،مغربی بنگال)لکھتے ہیں:”حضورتاج الشریعہ سے حضرت پیر سید محمد طاہر علاؤالدین القادری الگیلانی رحمۃاللہ علیہ بہت محبت فرمایا کرتے ان کے اصرار پر حضرت پاکستان بھی تشریف لے گئے واہگہ بارڈر پر حضرت کا استقبال صدر مملکت کی طرح ٧/ توپوں کی سلامی دے کر کیا گیا

حضرت کا قیام ان کے ایک عزیزشوکت حسن صاحب کے یہاں تھا راستے میں ایک جگہ ناشتہ کا کچھ انتظام تھاجس میں انگریزی طرز کے ٹیبل لگے تھے حضرت نے فرمایا :” میں پاؤں پھیلاکر کھانا تناول نہیں کروں گا ” پھر پاؤں سمیٹ کر سنت کے مطابق اسی کرسی پر بیٹھ گئے یہ سب دیکھ کر حاضرین کا زور دار نعرہ ” بریلی کا تقویٰ زندہ باد ” گونج پڑا ۔ ” [تجلیّاتِ تاج الشریعہ /صفحہ :٢٥٥]۔

مولانا منصور فریدی رضوی (بلاسپور ،چھتیس گڑھ)حضرت کے ایک سفر کا حال بیان کرتے ہیں:”محب مکرم حضرت حافظ وقاری محمد صادق حسین فرماتے ہیں کہ ، حضرت تاج الشریعہ کی خدمت کے لیے میں معمور تھا ۔ اور اپنے مقدر پر ناز کررہا تھا کہ ایک ذرہئ ناچیز کو فلک کی قدم بوسی کا شرف حاصل ہورہا تھا اچانک میری نگاہ حضوروالا(تاج الشریعہ ) کی ہتھیلیوں پر پڑی میں ایک لمحہ کے لیے تھرا گیا

آخر یہ کیا ہورہا ہے میری نگاہیں کیا دیکھ رہی ہیں مجھے یقین نہیں ہورہا ہے ۔ آپ تو گہری نیند میں ہیں پھر آپ کی انگلیاں حرکت میں کیسے ہیں؟ میں نے مولانا عبد الوحید فتح پوری جو اس وقت موجود تھے اور دیگر افراد کو بھی اس جانب متوجہ کیا تما م کے تما م حیرت و استعجاب میں ڈوب گئے تھے

معاملہ یہ ہے کہ آپ کی انگلیاں اس طرح حرکت کررہی تھیں گویا آپ تسبیح پڑھ رہے ہوں اور یہ منظرمیں اس وقت تک دیکھتا رہا جب تک آپ بیدار نہیں ہوگئے ۔ان تمام تر کیفیات کو دیکھنے کے بعد دل پکار اٹھتا ہے کہ ؎ سوئے ہیں یہ بظاہر د ل ان کا جاگتا ہے ” [تجلیّاتِ تاج الشریعہ /صفحہ :٣١٤]۔

ولی باکرامت

حضورتاج الشریعہ علیہ الرحمہ جہاں ایک عاشق صادق، باعمل عالم ،لاثانی فقیہ ، باکمال محدث ،لاجواب خطیب ،بے مثال ادیب ، کہنہ مشق شاعر تھے وہیں آپ باکرامت ولی بھی ہیں۔ کہا جاتا ہے استقامت سب سے بڑی کرامت ہے اور حضورتاج الشریعہ علیہ الرحمہ کی یہی کرامت سب سے بڑھ کر ہے ۔ ضمناًآپ کی چند کرامات پیش خدمت ہیں۔

مفتی عابد حسین قادری (جمشید پور، جھارکھنڈ )لکھتے ہیں:”٢٢/جون ٢٠٠٨ء محب محترم جناب قاری عبد الجلیل صاحب شعبہ قرأت مدرسہ فیض العلوم جمشید پوری فرمایاکہ چند سال قبل حضور تاج الشریعہ علیہ الرحمہ دار العلوم حنفیہ ضیا القرآن ،لکھنؤ کی دستار بندی کی ایک کانفرنس میں خطاب کے لیے مدعو تھے

ان دنوں وہاں بارش نہیں ہو رہی تھی ،سخت قحط سالی کے ایام گزررہے تھے، لوگوں نے حضرت سے عرض کی کہ حضور بارش کے لیے دعا فرمادیں ۔ حضرت نے نماز ِ استسقاء پڑھی اور دعائیں کیں ابھی دعا کرہی رہے تھے کہ وہاں موسلادھار بارش ہونے لگی اور سارے لوگ بھیگ گئے ۔ ” [تجلیّاتِ تاج الشریعہ /صفحہ :٢٢٩]۔

ڈاکٹر غلام مصطفی نجم القادری (ممبئی) لکھتے ہیں :” میسور میں حضرت کے ایک مرید کی دکان کے بازو میں کسی متعصب مارواڑی کی دکان تھی ، وہ بہت کوشش کرتا تھا کہ دکان اس کے ہاتھ بیچ کر یہ مسلمان یہاں سے چلا جائے ، اپنی اس جدو جہد میں وہ انسانیت سوز حرکتیں بھی کرگزرتا

اخلاقی حدوں کو پار کرجاتا، مجبور ہو کر حضرت کے اس مرید نے حضرت کو فون کیا ، حالات کی خبر دی ، معاملات سے مطلع کیا ،حضرت نے فرمایا:” میں یہاں تمہارے لیے دعا گو ہوں، تم وہاں ہر نماز کے بعد خصوصاً اورچلتے پھرتے ، اٹھتے بیٹھے سوتے جاگتے عموماً یاقادرکا ورد کرتے رہو۔”۔

اس وظیفے کے ورد کو ابھی 15/دن ہی ہوے تھے کہ نا معلوم اس مارواڑی کو کیا ہوا ، وہ جو بے چارے مسلمان کو دکان بیچنے پر مجبور کردیا تھا اب خود اسی کے ہاتھ اپنی دکان بیچنے پر اچانک تیار ہوگیا ۔ مارواڑی نے دکان بیچی ،مسلمان نے دکان خریدی، جو شکار کرنے چلا تھا خود شکار ہو کر رہ گیا۔ آج وہ حضرت کا مرید باغ و بہار زندگی گزار رہا ہے ۔ ” [تجلیّاتِ تاج الشریعہ /صفحہ :١٧٥،١٧٦]۔

موصوف مزیدلکھتے ہیں:”ہبلی میں ایک صاحب نے کروڑوں روپے کے صرفے سے عالیشان محل تیار کیا ، مگر جب سکونت اختیار کی تو یہ غارت گرسکون تجربہ ہوا کہ رات میں پورے گھر میں تیز آندھی چلنے کی آواز آتی ہے گھبرا کر مجبوراً اپنا گھر چھوڑ کر پھر برانے گھر میں مکین ہونا پڑا۔

اس اثناء میں جس کو بھی بھاڑے (کرایہ )پر دیا سب نے وہ آواز سنی اور گھر خالی کردیتے ۔ ایک عرصے سے وہ مکان خالی پڑا تھا کہ ہبلی میں حضرت کا پروگرام طے ہوا ، صاحب مکان نے انتظامیہ کو اس بات پر راضی کرلیا کہ حضرت کا قیام میرے نئے کشادہ مکان میں رہے گا ، مہمان نوازی کی اوردیگر لوازمات کی بھی ذمہ داری اس نے قبول کرلی

حضرت ہبلی تشریف لائے اور رات میں صرف چندہ گھنٹہ اس مکان میں قیام کیا ، عشاء اور فجر کی ٢/وقت کی نماز باجماعت ادا فرمائیں،اس مختصر قیام کی برکت یہ ہوئی کہ کہاں کی آندھی اورکہاں کا طوفان ، کہاں کی سنسناہٹ اور کہا ں کی گڑگڑاہٹ سب یکسر معدوم ہو گئی ، آج تک وہ مکان سکون و اطمینان کا گہوارہ ہے ۔ [تجلیّاتِ تاج الشریعہ /صفحہ :١٧٦]۔